映昔醫學台 之 暗瘡

暗瘡﹐或者青春痘﹐係一種發生於毛囊皮脂腺的慢性皮膚病。青春痘通常會為年輕人造成極大心理壓力同埋精神痛苦﹐尤其果D唧極都唧唔出o既暗瘡﹐更加可惡。不過﹐我地映昔醫學台o既 target customer 絕對唔係呢班唧唔出暗瘡o既年輕人。所以﹐我地今日將會探討一下另一種暗瘡o既徵狀﹐同埋解救辦法。

暗瘡﹐照字面解釋﹐其實好明顯就係講緊一種瘡疤﹔一種o係一般情況下唔會察覺到﹐淨係陰D陰D﹐但係到左午夜夢迴或者空虛寂寞果陣﹐就會帶俾人一種黯然神傷o既感覺。呢種暗瘡o既成因有好多﹐主要包括太蠢﹑太笨﹑或者因為太蠢太笨而瘀過... 等等。而通常﹐因為大部份人o既腦袋都有一個自我保護系統﹐所以好少人會知道或記得自己蠢過﹑笨過﹑瘀過。亦因為咁﹐暗瘡o既問題只會o係一個情況下出現﹐就係當有一類人無時無刻都會o係你面前提醒你邊年邊月邊日o係邊度做過D咩蠢事。當受害者被呢類人提醒之後﹐暗瘡就會o係你腦海湧現﹐令你自覺難堪﹐唔想見人。而呢類挑起你暗瘡o既人﹐o係醫學上有一個學名叫「人賤不能移」﹐我地簡稱為賤人。

解決暗瘡o既辦法其實只有兩個:

(一) 遠離賤人。只要佢賤你唔到﹐暗瘡就唔會出現啦。

(二) 先下手為強。當你可以做到比賤人更賤﹑更快出手/口﹐令其他賤人為求自保﹐無辦法/時間去挖掘你o既瘡疤﹐你就成功喇。

今日我地o既節目時間又差唔多喇喎﹐希望大家以後可以有效咁避開呢種暗瘡啦。拜拜!